Marôye d’Ardène



Marôye d’ Årdène

Ine gote di plève, tot come on pièle,... nèni, tot come ine låme, rida disqu’ a l’ tote bètchète d’ ine foye di fètchîre, halkina on moumint divant d’ si lèyî toumer, pèzante, èt d’ s’ aler stårer so l’ vért mossê.
I hèyéve a l’ êwe.
Dès neûrs ridôs d’ plêve si porminît so l’ valèye, nèyant tot l’ grand bwès... Ine blanke wapeûr vinéve foû dè vért tapis qu’ èsteût la, d’vant mi.
Coleûr dè timps... Coleûr di m’ coûr... Djusse a l’ îdèye.
Et dj’ èsteû la, trimpé come ine sope, dizos ine årdispène qui n’ m’ ahoûtéve di rin du tout, li cou so l’ frèh blånke pire qui boutéve foû on p’tit pô tot-avå, tot la.
Må... Et bin d’ èsse må !

Ine låme, tot come on pièle,... nèni, tot come ine gote di plêve rida so m’ vizèdje, divant d’ s’ aler piède Dju sét wice...
"Mayon, poqwè m’ avez-v’ qwité..." bièsse di tchanson qu’ dji n’ arivéve nin a m’ sètchî foû dèl tièsse...
Marôye m’ aveût qwité.
Marôye aveût vané.
Marôye aveût pèté èvôye.
Marôye n’ èsteût pus la... Et prindéve tote li plèce qui m’ coûr poléve rètrôcler.
Marôye n’ èsteût pus la... Et chasqu’ eune dès mèye di mèye di gotes di plève qui fît hilter lès foyes dè bwès tchantéve si no.
Måssîte Marôye.
Binamèye Marôye.
Marôye qui n’ rivinreût pus.

Dji n’ voléve pus brêre, dji n’ voléve pus cori, dji n’ voléve pus sofri, dji n’ voléve nin minme mori... Dji n’ voléve qu’ èsse la, tot p’tit, tot cafougnî, tot massî, tot frèh... Dji n’ voléve qui bagnî èst l’ påhûle doleûr qui broûléve mi-åme.
Påhûle. Et dji m’ èsok’ta.

Nosse payi, payi d’ Årdène, pwète, èl savez-v’, dès cintinnes d’ annèyes di macral’rèye divins sès bwès... Awè, å timps dès-ordinateûrs, di l’ avion, dès voyèdjes tot-å coron dè cîr, å timps dès-ôtoroutes, nos grands bwès on wårdé tote leû macral’rèye... Eco pôr qwand i hèye a l’ êwe, èco pôr qwand ’ne blanke wapeûr gripe po d’zeûr li vért tapis, èco pôr qwand on coûr al dilouhe s’ î lêreût mori d’ s’ î sinti amon lu minme.

Est-ce po çoula ?

Quî ataka ? Li vint, li broumeûr, li plêve, l’ årzèye ? Turtos èssonnes ?... Mi dji n’ èl såreû dîre ca qwand dj’ èl vèya èlle èsteût dèdja la... Elle èsteût dèdja lèye... Mi Marôye d’ Årdène...
Bèle, bèle, bèle come on solo.
Pus bèle minme qu’ è m’ sov’ni... Mi Marôye da meune !
Ossi vrèye qui l’ Årzèye la qu’ lès-åbes åtoû d’ mi hèyît leûs rècènes divins.
Avou dès båhes frèhes come ine pitite plêve d’ osté.
Et fièstante, can’dôzante come on vint d’ prétimps.
Mins, so l’ minme timps, freûde, come on brouliård d’ årîre-såhon.
Mins la, bin la, èt... da meune !

Roûvèye li plêve ! Roûvèye li boumeûr ! Roûvî li vint ! Roûvèye mi ponne...
I féve tchôd... I lûhéve lès qwate solos... Lès-oûhês tchantît a s’ ènnè fé pèter l’ gozî... Et mi, èt mi, èt mi.... èt mi dj’ èsteû-st-ureû... Et mi dj’ èsteû li rwè.
Et Marôye èsteût la, tote nowe... Et mi avou, tot nou... Come lès prumîs-èfants dèl tére !
Mins nos djeûs n’ èstît nin dès djeûs d’ èfants, la, tot nous, so l’ foû mèzeûre lét qui l’ vért mossê aveût fêt po nos-ôtes.
Mès båhes, comes sotes, corît tot avå so s’ cwérp si bê, tot avå divant d’ s’ aler piède å pus tinrûle, å pus s’crèt di lèye minme la wice qu’ èle odéve si bon come ine sinteûr di d’zos d’ mwètès foyes.
Avez dèdja houmé come ine sinteûr di d’zos d’ mwètès foyes ? Sins çoula vos n’ avez dja måy rin k’nohou.

"Vinez" mi d’ha-t-èle come on sofla d’ vint qui s’ kihèye divins lès pus hôtès dès sapins... Et s’ fourit l’ seûl mot qu’ èle mi d’ha.
Mins s’ n’ ènnè ratindéve-djdju nol ôte !
Et dji fouri-st-è Marèye come on pout-èsse divins ’ne catèdråle : tot p’tit, si p’tit po-z-ataker, mins m’ rindant bin vite compte qui dj’ lî poléve fé tchanter on doû êr qui m’ rimplihéve mi minme.
Dj’ èsteû èfant, cîr, tére... Li pus grand dès grands ciérs d’ Årdène èt m’ bihe èsteût la, tot åtoû d’ mi, si riyant di m’ plêzîr qui montéve, si troûblant dè sonk’ qui m’ ridjognîve...
Marôye å cwèrp si bê qui m’ coûr ènnè div’néve sot, ènnè hiltéve è m’ bodje come on maka so on pèzant strouk’ di bwès.
Tot d’ on côp, lès dièrins bårèdjes qui rat’nît co nos deûs plêzîrs s’ ont kihiyî èt s’ avans-gne brê ! Brê di tant d’ sintumints rat’nous... Di boneûrs, di ponnes... Di sondjes èt d’ tchôdes markes... D’ èspwérs èpt d’ neûrès-îdèyes.
Et s’ avans-gn’ brê d’ èsse arivés si hôt.

C’ è-st-a c’ moumint-la qu’ dji m’ åreû d’ vou dispièrter...

Mins c’ è-st-a c’ moumint la qu’ dji mora...

Ennè poléve nin èsse ôtrumint. Dji d’véve lèyî m’ cwérp la... Dji d’véve lèyî m’ cwérp ènnè raler a l’ nateûre... Come po l’ payî... Awè, on pô come po l’ payî d’ aveûr fordjî on cwérp al Marôye qu’ èsteût co todi è m’ tièsse.
C’ è-st-a c’ moumint la qu’ dji mora... Lèyant la on cwérp div’nou trop pèzant po mi-åme... Po mi-åme qui coûrt, dispôye adon, ureûze, divins lès grands bwès mahèye po todi al l’ cisse di m’ Marôye...
Di m’ Marôye d’ Årdène !

 


Jacques WARNIER
èl nut’ dè 17 dè meû d’ may 1995
rue Petit Rivage à Jehay